આ ટુર્નામેન્ટમાં કુલ 10 મિલિયન ડોલર એટલે કે એક કરોડ ડોલરના ઈનામ આપવામાં આવ્યા
અમદાવાદ
ભારત અને ઓસ્ટ્રેલિયા વચ્ચે અમદાવાદના નરેન્દ્ર મોદી સ્ટેડિયમમાં ક્રિકેટ વર્લ્ડકપની ફાઈનલ મેચ રમાવા જઈ રહી છે. રવિવાર, 19 નવેમ્બરે બપોરે બે વાગ્યે આ મહામુકાબલો શરૂ થશે. ક્રિકેટ વર્લ્ડકપની ફાઈનલ એ સૌથી મહત્ત્વની મેચ હોય છે જેના અંગે કેટલીક વાતો જાણવી જરૂરી છે. જેમ કે આ દિવસે વરસાદ પડે અથવા કોઈ પણ કારણોથી મેચ રમી શકાય કે નહીં. આ ઉપરાંત આ ટ્રોફી જીતનાર ટીમને અને ખેલાડીઓને કેટલું ઈનામ મળશે તેવો સવાલ પણ લોકોના મનમાં થાય છે.
આ વખતનો ક્રિકેટ વર્લ્ડકપ એ ભારતમાં 12 વર્ષ પછી પ્રથમ મોટી ટુર્નામેન્ટ છે. અમદાવાદના જે સ્ટેડિયમમાં મેચ રમાવાની છે તેની કેપેસિટી લગભગ 1.35 લાખ પ્રેક્ષકોને સમાવવાની છે અને તમામ ટિકિટ બૂક થઈ ગઈ છે. અગાઉ વર્ષ 2003માં ભારત અને ઓસ્ટ્રેલિયા વચ્ચે જોહાનેસબર્ગમાં મુકાબલો થયો હતો જેમાં ભારત હારી ગયું હતું. આ વખતે ભારત બાજી પલ્ટાવી શકે છે કે નહીં તે જોવાનું રહેશે.
આઈસીસી ક્રિકેટ વર્લ્ડકપ વિશે કેટલીક રોમાંચક વાતો
1. ક્રિકેટ વર્લ્ડકપમાં ઓસ્ટ્રેલિયા એ સૌથી સફળ ટીમ છે જે અત્યાર સુધીમાં છ વખત વર્લ્ડકપ જીતી ચૂકી છે.
2. ખરાબ હવામાન અથવા વરસાદના કારણે ફાઈનલ મેચ ધોવાઈ જાય તો તેના માટે એક રિઝર્વ દિવસ રાખવામાં આવ્યો છે.
3. ફાઈનલમાં વિજેતા બનનાર ટીમને 40 લાખ ડોલરનું પ્રાઈઝ મળશે જ્યારે રનર્સ-અપને 20 લાખ ડોલર મળશે.
4. આ ટુર્નામેન્ટમાં કુલ 10 મિલિયન ડોલર એટલે કે એક કરોડ ડોલરના ઈનામ આપવામાં આવ્યા છે. અત્યાર સુધી ગ્રૂપ સ્ટેજમાં જે ટીમ જીતતી હતી તેમને દરેક વખતે 40,000 ડોલરનું ઈનામ આપવામાં આવ્યું હતું. એટલે કે ભારતીય ટીમ ગ્રૂપ સ્ટેજમાં 9 વખત 40,000 ડોલરનું ઈનામ જીતી ચૂકી છે. સેમી ફાઈનલની કમાણી અલગ.
5. વર્લ્ડકપની બંને સેમી ફાઈનલ રમાઈ ગઈ છે. સેમી ફાઈનલમાં હારનારી ટીમોને 8 લાખ ડોલર મળ્યા છે. એટલે કે ન્યૂઝિલેન્ડ અને સાઉથ આફ્રિકાને 16 લાખ ડોલરનું પ્રાઈઝ મળ્યું છે.
6. ગ્રૂપ સ્ટેજ પછી જે ટીમો ફેંકાઈ ગઈ હોય તેમને એક-એક લાખ ડોલરનું પ્રાઈઝ મળ્યું છે. એટલે કે સેમી ફાઈનલમાં નથી આવી શકી તેવી છ ટીમોને કુલ છ લાખ ડોલર ચૂકવાયા છે.
7. આ વખતના વર્લ્ડકપમાં કુલ 45 ગ્રૂપ સ્ટેજની મેચ હતી અને અગાઉ જણાવ્યું તેમ દરેક વિજેતા ટીમને 40 હજાર ડોલરનું પ્રાઈઝ મળ્યું છે. એટલે કે ગ્રૂપ સ્ટેજની મેચોમાં 18 લાખ ડોલરના પ્રાઈઝ અપાઈ ગયા છે.
8. ભારત એક પણ લીગ મેચ હાર્યું ન હોવાના કારણે તેને 9 મેચમાં 18 પોઈન્ટ મળ્યા હતા. ભારતની નેટ રનરેટ 2.570 છે જે ગ્રૂપ સ્ટેજમાં સૌથી બેસ્ટ હતી.
9. વર્ષ 2025માં મહિલાઓનો ક્રિકેટ વર્લ્ડકપ યોજાશે. તેના માટે પણ પુરુષોના વર્લ્ડકપમાં અપાતી પ્રાઈઝની રકમ એક બેન્ચમાર્ક બનશે. આઈસીસીએ નક્કી કર્યું છે કે મહિલાઓને પુરુષો જેટલું જ વળતર ચૂકવાશે. સાઉથ આફ્રિકામાં જુલાઈ 2023માં આ અંગે નિર્ણય લેવાયો હતો.