યુનેસ્કોમાં ફરી જોડવા બાઈડન તંત્રની સક્રિય હિલચાલ

યુએસ સ્ટેટ ડિપાર્ટમેન્ટના જણાવ્યા અનુસાર યુએસએ યુનેસ્કોમાં ફરી જોડાવવા માટે ગયા સપ્તાહના અંતમાં પત્ર મોકલવામાં આવ્યો

વોશિંગ્ટનઃ
સંયુક્ત રાષ્ટ્ર સંગઠન યુનેસ્કો (યુનાઈટેડ નેશન્સ એજ્યુકેશનલ એન્ડ સાયન્ટિફિક એન્ડ કલ્ચરલ ઓર્ગેનાઈઝેશન)થી લગભગ પાંચ વર્ષ દૂર રહ્યા બાદ અમેરિકાએ ફરી એકવાર આ સંગઠનમાં સામેલ થવાની ઈચ્છા વ્યક્ત કરી છે. અમેરિકન રાષ્ટ્રપતિ જો બાઈડેનના વહીવટીતંત્રે કહ્યું છે કે અમેરિકા યુનેસ્કોમાં ફરી જોડાશે.
બાઈડેનના પુરોગામી ડોનાલ્ડ ટ્રમ્પના કાર્યકાળ દરમિયાન પાંચ વર્ષ સુધી અમેરિકા તેનાથી દૂર રહ્યું હતું. યુએસ સ્ટેટ ડિપાર્ટમેન્ટના જણાવ્યા અનુસાર યુએસએ યુનેસ્કોમાં ફરી જોડાવવા માટે ગયા સપ્તાહના અંતમાં પત્ર મોકલવામાં આવ્યો હતો.
મંત્રાલયના જણાવ્યા અનુસાર મેનેજમેન્ટ બાબતોના રાજ્યના નાયબ સચિવ રિચાર્ડ વર્મા દ્વારા 8 જૂને મોકલવામાં આવેલા પત્રમાં સંસ્થામાં યુએસના પુનઃ પ્રવેશ માટેની યોજના પ્રસ્તાવિત કરવામાં આવી હતી.
વિદેશ મંત્રાલયે એક નિવેદનમાં કહ્યું હતું કે આવા કોઈ પણ પગલા માટે યુનેસ્કોના વર્તમાન સભ્યોની સંમતિની જરૂર પડશે. અમને લાગે છે કે આગામી દિવસોમાં યુનેસ્કોનું નેતૃત્વ સભ્યોને અમારા પ્રસ્તાવથી વાકેફ કરશે.
દરખાસ્તની વિગતો તાત્કાલિક આપવામાં આવી ન હતી. અત્રે ઉલ્લેખનીય છે કે અમેરિકાના ભૂતપૂર્વ રાષ્ટ્રપતિ રોનાલ્ડ રેગને 1983માં યુનેસ્કોમાંથી ખસી જવાનો નિર્ણય લીધો હતો.
ત્યાર બાદ ભૂતપૂર્વ રાષ્ટ્રપતિ જ્યોર્જ ડબ્લ્યુ. બુશે 2002માં યુ.એસ.ને સંગઠનમાં ફરીથી પ્રવેશ આપ્યો. ટ્રમ્પે કથિત રીતે 2017માં તેના ઈઝરાયેલ વિરોધી પૂર્વગ્રહને લઈને વિરોધ વ્યક્ત કર્યો હતો અને યુએસને તેમાંથી પાછું ખેંચી લીધું હતું. ઈઝરાયેલે પણ તે જ સમયે યુનેસ્કોમાંથી ખસી જવાની જાહેરાત કરી હતી, જોકે તેણે જાન્યુઆરી 2018માં આમ કર્યું હતું.
યુએસ સ્ટેટ ડિપાર્ટમેન્ટના અધિકારીના જણાવ્યાનુસાર યુનેસ્કોમાં ફરી જોડાવાથી અમને ચીન સાથેની વૈશ્વિક સ્પર્ધામાં આપણી ગેરહાજરી જે પડકારો પેદા કરી રહી છે તેનો સામનો કરવાની તક મળશે.